Ushbu kartinada kuzning so’nggi kunlari manzarasi aks ettirilgan. Realizm uslubida ishlangan kompozitsiya syujetida uylar oralab joylashgan loy, tor ko’cha manzarasi o’rin olgan. Daraxtlarning sarg’ish yaproqlari allaqachon yerni qoplagan. Kichik ariqdan suvning to’lib oqishi va yerning namiqqanligi yaqindagina yomg’ir yog’ib o’tganidan dalolat beradi. Chap qismda simyog’och ortida ikki personajning silueti ko’zga tashlanadi. Bu obrazlar kartinaga jonlilik bag’ishlaydi. Asar doimo ko’z o’ngimizda bo’lgan manzaraning go’zalligini ochib bergan. Shu bilan birga muallif tomoshabinga kuzning asl qiyofasi va uning ruhiyatini hech qanday qo’shimcha bo’rttirish va o’zgarishlarsiz yetkaza olgan.