Maishiy janrda ishlangan ushbu kartinada ayol uchun aziz va bebaho ne’mat hisoblangan farzand va uni voyaga yetkazish jarayoni tasvirlangan. Ijodkor onaning faqat kunduzi emas, balki, tunlari ham bedor o’tishini, uning mehr bulog’i farzandi oromi uchun tinimsiz “jildirashi”ni aks ettirgan. Sokin, yarim tun pallasi va butun olam uyquda. Faqat ona deraza osha qorong’ulikning quyuq sharpasini tomosha qilib turibdi. Xona o’rtasida beshik tasvirlangan bo’lib, undagi go’dak beg’am va behavotir orom olmoqda. Kartinada qorong’u tun vaqti tasvirlangani uchun, chizgilar aniq ko’zga chalinmaydi. Xuddi inson ko’zlari qorong’ulikda qanday ko’rsa, ijodkor ham kartinani shunday tasvirlagan. Asarda kaloriti mohirona tanlangan bo’lib, bu qorong’ulik yanada ishonarli aks etishiga yordam bergan.