Kartinada saroy xonimlari davra qurib o’tiribdi. Eng yuqorida, moviy libosda Saroy Mulk xonim (Bibixonim) tasvirlangan. Bibixonim zamonasining yuksak idrokli, farosatli, tadbirkor va aql-zakovat sohibasi, husn-latofat bobida ham benaziri edi. Saroy Mulk xonim insonparvar, vatanni sevguvchi, mamlakatning siyosiy-ijtimoiy, iqtisodiy va madaniy hayotidan yaxshigina xabardor bo‘lgan, saltanat ishlarida dono maslahatlari bilan qatnashib turgan ayol hisoblangan. Ijodkor kartinada bularning barchasini ko’rsatishga harakat qilgan. Ko’ndalang xolatda tuzalgan dasturxon, shom qorong’usini yoritish maqsadida dasturxon bo’ylab shamlar yoqilgan. Ayollar orasida Bayon Sulduzning qizi — Ulus Og‘oni, Xizr Yasuriyning qizi—Islom Og‘oni hamda Tag‘oy Turkon Xotunlarni ko’rishimiz mumkin.