Insonning eng go’zal va beg’ubor davri shubhasiz bolaligidir. Ushbu kartinada ham ijodkor ana shunday unitilmas va jo’shqin davrni o’z chizgilari yordamida ochib bergan. Maishiy janrda ishlangan ushbu asar markazida qafasda qush ovlovchi ikki bolaning tasviri gavdalantirilgan. Ikki do’stning ham boshlarida iroqi do’ppi, egnida chopon va belida belbog’ bo’lib, bu bilan ijodkor asarda o’sha davr ruhiyatini ochib bergan. O’ng tarafdagi bolaning qo’lida qafasda solingan to’rg’ay, chap tarafdagi bolaning qo’lida esa xo’roz va oila, do’stlik ramzi hisoblangan anor tasvirlangan. Orqa fonda qafasga solingan qushlar tasviri chizilgan bo’lib, bu ikki do’stning qizg’in suhbati qushlar mavzusida ekanligini anglatib turibdi.