Maishiy janrda ishlangan ushbu kartinada, ijtimoiy hayotimizda muhim ahamiyat kasb etadigan “kelin kuzatish” marosimi tasvirlangan. Rassomning hayotiy kuzatishlari natijasida tanlangan ushbu mavzu kompozitsyaning tuzilishiga asos bo`lgan. Asarda oddiy xalq hayotidan olingan obrazlar ko`rsatilgan va turli qahramonlar bilan boyitilgan. Odamlar yig`ilishib, xursand holatda kelinni yangi uyiga kuzatishmoqda. Kimdir kelinning yonida turib, unga maslahat berayapti, kimdir doira va surnay sadosi ostida raqs tushib o`ynayapti, kimlardir zavq bilan kuzatishayapti, bolalar esa yaxshiroq ko`rish uchun daraxt ustidan qarab turishibdi. Bu esa o`z navbatida o`ziga xos birlik hosil qilayapti. Asarda ijodkor ranglardan ham mohirona foydalangan bo`lib, bu tomoshabinni tasvirni yaxshiroq anglashiga yordam beradi.