Ushbu kartina maishiy janrda ishlangan bo’lib, tabiat va inson turmush tarzining uyg’unligini ko’rsatib bergan. Suratda asosiy e’tibor – fondagi quyosh nuri tasviriga qaratilgan. Erta tongda quyosh nurlari go’yo zulmatni surib, o’ziga yo’l ochayotgan yengilmas kuch singari oltin zarralarini tabiatga ulashmoqda. Kartinada qishloq manzarasi pastqam uylar, yog’och eshik, paxsa devor va tosh yo’llar tasviri orqali ko’rsatib berilgan. Uylar yonidagi daraxtlarda hech bir harakat va tebranish holati ko’rinmaydi. G’o’yo butun olam zulmat ichra uyquga cho’mgan-u, quyoshning ilk nurlari unga jilo va tiriklik ulashayotgandek taassurot qoldiradi tomoshabinda. Ijodkor kartinada asosan to’q ko’k, qora, sariq rangdan foydalangan. Nur va soya chizgilari esa quyosh harakatini va tasvirning jonli chiqishini ta’minlab bergan. Rasmning har bir tafsiloti professional tarzda, sevgi va hayrat bilan tasvirlangan.