Ushbu kartinada rassom yoz oqshomlaridan birini tasvirlagan. Kompozitsyaning asosi masjid hovlisi bo`lib, uning atrofida ustunli ayvon mavjud. Ustunlar hamda darvozalar o`ymakorlik san`ati asosida pardozlangan. Atrofda esa hujralar va daraxtlarning soyalari o`ynab turibdi. Oy yorug`ida nuroniy otaxon Ollohga zikr aytish bilan band. U yulduzlar bilan to`lib-toshgan osmonga qaragancha buyuk Yaratuvchini ulug`lamoqda. Ijodkor bunda hech qanday serhashamlik yoki jozibadorlikka yo`l ochmagan. Tomoshabinga faqat musulmon insonning pok yuragini-yu, Robbisi ishqiga to`la qalbini ko`rsatishga harakat qilgan va tom ma`noda buni uddasidan chiqqan. Bu esa asar mohiyatini yanada oshirgan.