Manzara janrida ishlangan ushbu kartinada tabiatning kuzgi ko`rinishi aks etgan. Peyzaj sodda shu bilan birga aniq tasvir uslubiga ega. Asarda erta tong, quyosh ufqdan bosh ko`tarayotgan mahaldagi adir go`zalligini ko`rish mumkin. Shu bilan birga rassom tabiat olamining eng nozik, tipik holatini anglab , unga bo`lgan estetik munosabatini ham bildirgan. Kartinaning old qismida sokin daraxtlar quyoshning xira nurlari ostida ham yorqin va porlab turibdi. Kuzgi osmon deyarli bir xil, moviy rangda tasvirlangan. Biroz bulutli bo`lsada qayg`u yo`q. Uzoqdagi purviqor tog`lar moviysimon, ko`kimtir tusda osmon bilan uyg`unlashib ketgan. Asar orqali tabiatning yengil nafasini his qilamiz. Saxiylik bilan yaratilgan bu shabada nafasi eshitilmaydi ammo yomg`ir hidlari kabi salqinlik va poklik bag`ishlaydi.