Ushbu kartinada Boysun tog’lari orasida joylashgan kichik qishloq manzarasi aks etgan. Ijodkor asosiy kompozitsiya sifatida qishloq manzarasini tasvirlagan bo’lsada, quyoshning issiq nafasiga ko’proq urg’u bergan. Quyosh nurlari qishloq uylarining devor va tomlarida, sarg’aygan o’tlarning mayin tovlanishida, hatto, tog’larning katta-kichik burmalarida ham sarg’ish nurlari bilan iz qoldirgan. Ijodkor haroratning baland ekanligini osmondagi sarg’ish va qizg’ish ranglarning uyg’unligi yordamida yanada aniq tasvirlagan. Asarga tikilib quyoshning issiq, biroq dilga yaqin haroratini his qilasiz. Asar kompozitsiyasi sodda, tuval esa o’zaro uyg’un. Bu esa asarning jozibadorligini yanada oshirgan.