Ushbu minyatura nozik chizgilari, xilma-xil syujeti va turfa xil koloritga boyligi bilan hech bir tomoshabinni diqqatidan chetda qolmaydi. Asar buyuk ijodkor Abdurahmon Jomiyning “Silsilat al-zahab” asarining ikkinchi daftari bo’lgan “Haft avrang” (Yetti taxt) mazmuniga ko’ra ishlangan. Minyatura Buxoro ipak qog’ozida ishlangan bo’lib, unda tabiiy ranglar, tempera, akvarel va oltin yordamida sayqal berilgan. Asarda ikki qavatli, nihoyatda ko’rkam hammom tasviri aks etgan. Birinchi qavatda zodagonlarning yuvinish, soch-soqol olish jarayoni tasvirlangan bo’lsa, ikkinchi qavatda hammomdan chiqqanlar o’z liboslarini kiyib, o’zlariga oroyish berish jarayoni aks etgan. Tasvir syujeti qahramonlarining liboslaridan bu yerda turli millat vakillari doimiy tashrif buyurishini bilish mumkin. Bino devorlari nafaqat turli bezak va naqshlar yordamida sayqal berilgan, shuningdek fors tilida, qora nasta’liq yozuvi bilan bitik ham bitilgan. Yorqin ranglarning boyligi, betakror kompozitsiya, mukammal chizgilar natijasida minyatura haqiqiy san’at asari darajasiga erishgan.