Keskin ranglar o'yini bilan yaralgan ushbu mahobatli rangtasvir asari personajlarning tuxum shaklida ekanligi bilan insonlarni o'ziga jalb etadi. Unda inson obrazini yaratayotgan tuxumlar har xil holatda ishlangan. Qaysi biridir yuqoriga intilmoqda, qay biridir joyida qotib qolgan, yana qaysi biridir o'zini osmoqchi bo'lyapti... Yumor va haqiqat bilan yo'g'irilgan ushbu asar yetuk rassomlar tomonidan ijobiy baholangani bejizga emas. Asarni tomosha qilar ekan, har bir tomoshabin undan o'zini izlaydi. Aynan bugungi kunda «Men» qaysi tuxum o'rnida turibman, balki narvondan endigina yuqoriga ko'tarilayotganidirman, yoki bir joyda qotib qolgan harakat qilmayotganimanmi…Bu esa insonni fikrlashga va shu bilan olg'a intilishga, eng yuqori cho'qqida xotirjam turgan tuxum kabi bo'lmoqlikka urinishga undaydi.