Manzara janrida ishlangan ushbu kartinada musiqachilar hamda o`zbek milliy cholg`u asboblari tasvirlangan. An`anaviy cholg`u asboblari ko`p asrdan o`tib kelayotgan musiqa madaniyatimizning ajralmas bir qismi ekanligi kompozitsyaning muhim g`oyalaridan biri hisoblanadi. Tasvirda asosiy obyekt sifatida musiqachilarni ko`rishimiz mumkin. Ular xuddi ohang singari iliq, yengil va g`amgin. Bir qarashda nimani his qilishayotganini anglab bo`lmaydi. Orqa fonda memoriy obidalar ko`rsatilgan. Ijodkor bu orqali millatimizga xos qadimiylikni ochib berishga harakat qilgan. Asarda ranglar uyg`unligiga ham o`ziga xos tarzda yondashilgan. Moviy, qizg`ish va sariq ranglarning birlashib ketishi tomoshabinga ohangni his qilishga yordam beradi.