Ushbu avangard uslubida ishlangan kartinada barcha uchun aziz va mo’tabar ona portreti gavdalangan. Rassom ona obrazini mehnatda toblangan qo’llarini tizzalari ustiga qo’yilgan, hayolga cho’mgan qiyofada tasvirlaydi. Ayol yuzidagi chuqur ruhiy holati, uning g‘amgin chehrasidagi mayus ko‘zlari, mehnatda toblangan yuzidagi ajinlaridan qiyinchilikda o’tgan hayoti haqida so’zlab beradi. Orqa fonda tasvirlangan kichik uylar va sahro fikrimizni tasdiqlagandek go’yo. Asarda sahro manzarasining gavdalanishi, osmonda tasvirlangan zangori parchalar onaning bardoshiga ishora qiladi. Ushbu asar barcha qiyinchiliklarga dosh bera olgan ona irodasi, uning buyukligini madh etadi.