Hattotlik san`ati ijodkordan katta tajriba va mahorat talab qiladi. Ushbu kartinaga ham o`ta mohirlik bilan yondashilgan va unda Quron oyatlarining “sayyidasi” hisoblangan Oyatal Kursiy tasvirlangan. U Baqara surasining 255-oyati bo`lib, insonlarga najot beruvchi oyat hisoblanadi. Asarda qora rang yetakchilik qilgan, chunki u ulug`vorlik ramzi sifatida asar mohiyatini ochib bergan. Oyatlar tilla rangda tasvirlanadi, bu esa tomoshabinga ichki xotirjamlik baxsh etadi. Asar markazida Olloh so`zi ifodalangan, atrofi esa doira shaklda bezatilgan. Musavvir kartinaning to`rttala chetini ham islimiy naqshi yordamida pardozlagan va bunga oq rangni munosib ko`rgan. Bu bilan ushbu ulug` oyatdan faqat poklik ufurib turishini tomoshabinga ko`rsata olgan.