Yam yashil adirlar, gullagan daraxtlar ayni bahor ayyomi bo’lmish “Navro’z” dan darak berib turibdi. Kartinada milliy inshoatlar va o’tovlar yonma-yon tasvirlangan. Bu Navro’zning uzoq davrlar mobaynida ham ko’chmanchi hamda o’troq aholining sevimli bayrami bo’lib shakllanib kelganidan darak berib turibdi. Kartinaning birinchi planida ot choptirayotgan qiz va yigit tasvirlangan. Bu o’ziga xos milliy sport o’yinlardan biri bo’lgan “qiz quvdi” o’yinidir. Bunda yigitlarning chavondozligi sinovdan o’tkaziladi. Ular otda qizga yetib olishlari kerak. Agar yetib olishsa qiz unga turmushga chiqadi. Yetib ololmasa qiz yigit uchun armonga aylanadi. Bundan ko’rinib turibdiki nafaqat o’zbek yigitlari balki o’zbek qizlari ham chavondozlikda tengsiz bo’lgan. . Asarda milliy kashtalarimiz, so’zana, alacha, atlas kabi milliy matolarimiz ko’rsatib berilgan. Kartinada harakat va ko’tarinki ruh mujassam. Bu ranglar uyg’unligi bilan qo’shilib mukammal syujetni hosil qilgan.