Ganj o’ymakorligi eng murakkab, mukammal va jozibador bezak boʻlib, koʻp asrlik ijodiy mehnat anʼanalari samarasidir. Undan jamoat binolari va turar joylarni bezatishda keng foydalaniladi. Jumladan ushbu uyni bezashda ijodkor ganjkorlik va maqqoshlikdan mohirona foydalana olgan. Ko’rib turganingizdek ganjdan nafaqat bezak sifatida foydalanilgan, balki uni binokorlikni ajralmas qismiga aylantirilgan. Undagi murakkab girihlar puxta oʻlcham bilan ishlangan. Naqsh mujassamotini anʼanaviy oʻsimliksimon (islimiy) va handasiy (girix) naqshlar tashkil etgan. Yorqin ko’zga tashlanib turgan oq ustunlar hashamdorlikni yanada oshirib ko’rsatilishiga sabab bo’lgan. Ustunlarni yuqori qismiga ravoqsimon bezak berilib, eng tepasida arab yozuvida bitiklar bitilgan.