Bilamizki, arab yozuvining O’rta Osiyoga kirib kelishi xattotlik san’atini rivojlanishiga sabab bo’ldi. Ayniqsa, Temuriylar va Shayboniylar sulolasi hukmdorlik qilgan davrda bu san’at yuksak darajada taraqqiy etdi. Endi xattotlar nafaqat kitoblarda, balki, ulkan memoriy obidalarda ham bu san’atdan keng foydalana boshlashdi. Yuqoridagi mehrobda xattotlik san’atidan mohirona foydalangan holda go’zal san’at na’munasi yaratilganiga guvoh bo’lishimiz mumkin. Mehrob uch qismga ajratilgan bo’lib, qismlarni tilla rangda ishlov berilgan chiziqlar bir- biridan ajratib turibdi. Birinchi qismda Qur’on oyatlaridan na’munalar to’q ko’k rangda mohirona yozilgan bo’lsa, ikkinchi qismda o’ng tarafda nozik bezaklar orasida tilla rangda “Olloh”, chap tarafda xuddi shu tarzda “Muhammad” so’zlari bitilgan. Markazda yashil rangli dumaloq shakl ichida tilla yozuvda “La ilaha illolloh, Muhammadur rosulolloh” kalimasi keltirilgan.